Сопственикот на Tesla, Илон Маск, продаде уште 7,92 милиони акции од таа компанија во вредност од околу 6,88 милијарди долари, јавува BBC.
Како што покажуваат регулаторните документи, продажбата е направена по годишното собрание на акционери на компанијата минатата недела.
Маск тврди дека парите му требаат во случај да биде принуден да го купи Twitter за 44 милијарди долари.
Мултимилијардерот моментално е вовлечен во правна битка со Twitter, откако минатиот месец изјави дека ќе се повлече од купопродажниот договор.
Последните трансакции се направени на 5, 8 и 9 август, според шест податоци и поднесоци до Комисијата за хартии од вредност на САД.
Откако беше објавена веста за продажбата на акциите, Маск на Twitter одговори дали ја завршил продажбата на акциите на Tesla со „да“, додавајќи дека парите му требаат во случај да биде принуден да го купи Twitter, и да не може да обезбеди дел од финансирањето.
На прашањето од друг корисник дали повторно би купил акции на Tesla доколку не се случи преземањето на Twitter, Маск исто така одговори потврдно.
Во јули, Маск рече дека планира да се повлече од својата понуда за купување на Twitter, што ја натера компанијата да го тужи. Најбогатиот човек на светот ја обвини компанијата дека крие информации за лажни сметки.
Пред неколку недели, американски судија одлучи, дека тужбата на Twitter против Маск треба да оди на судење во октомври. Twitter се надева дека судот ќе му нареди на Маск да го заврши преземањето по договорената цена од 54,20 долари по акција.
Деталите за противтужбата на Илон Маск се уште не се објавени.
