Во последните неколку месеци, стриминг платформата Нетфликс, западна во криза. По долги години работа, за прв пат оваа година имаат намалување на своите корисници и приходи, што резултираше со отказ на околу 150 вработени и тоа само еден месец откако објави дека губи претплатници за прв пат по десет години.
Отпуштањата главно ќе влијаат на филијалата во Калифорнија која вработува околу два отсто од северноамериканскиот персонал. Нетфликс како причина за отпуштањата ги наведува падот на приходите, јавува Би-би-си.
Според информациите на интернет, најмногу отпуштања компанијата ќе има во секторот на вработување, комуникации и содржина.
Нетфликс се бори со заминувањето на претплатниците. Во април тој изненади со објавата дека изгубил 200.000 претплатници во првиот квартал од 2022 година и предупреди дека може да остане без уште два милиони во следниот квартал. После таа објава, акциите на компанијата паднаа за 35 проценти и тоа за само еден ден. Тие сега се тргуваат по 190 долари, 46 отсто помалку отколку пред објавувањето на падот на претплатниците.
Иако Netflix има 220 милиони претплатници на глобално ниво и очигледно останува лидер на пазарот, тој неодамна се соочи со жестока конкуренција од платформи како Disney Plus, HBO и Prime Video на Amazon.
Во минатомесечниот извештај за финансиии, компанијата наведе дека бројот на претплатници бил оштетен од војната во Украина и одлуката да се зголемат цените во САД. Се проценува дека само повлекувањето од рускиот пазар однело 700 илјади претплатници на Нетфликс.
Некои аналитичари веруваат дека по зголемувањето на бројот на претплатници за време на пандемијата, Netflix остана без едноставни начини да го развие својот бизнис. Компанијата бара поевтин бизнис модел базиран на реклами и шпекулира дека планира да престане да споделува лозинки меѓу домаќинствата.
ФОТО: Unsplash
