Денеска Џентлмен Магазин“, во соработка со „Арс Ламина“ и другите издавачки куќи од нашата земја, почнува со претставување на нивните нови (па и постари) книги, т.е. изданија, кои во најголема мера ќе се однесуваат на машката читателска публика, односно ќе бидат наменети за неа, со надеж дека ќе го привлечеме вниманието и на жените читатели. Книгите ќе можете да ги купите во нивните продажни места или да ги нарачате онлајн. Покрај тоа, наскоро ќе доделуваме и награди (книги) за вашата верност кон „Џентлмен Магазин“. Затоа, следете нѐ. И читајте. Книгата е прозорец кон светот. Едновремено ги проширува видиците, исто како и веб-страниците.
Тој е шармантен, елегантен и генијален. Секоја негова авантура е проследена со возбуда, но и стил. Запознајте го џентлменот крадец Арсен Лупен – главниот протагонист во книгите на францускиот писател Морис Леблан. Издавачката куќа „Арс Ламина“, под својот импринт „Арс Либрис“, на англиски јазик објави серијал со девет книги за авантурите на принцот на крадците.
Станува збор за насловите: „The extraordinary adventures of Arsène Lupin, gentleman-burglar“, „Arsène Lupin versus Herlok Sholmes“, „Further adventures of Arsène Lupin“, „The confessions of Arsène Lupin“, „Arsène Lupin: The secret of Sarek“, „Arsène Lupin: The eight strokes of the clock“, „Arsène Lupin: The secret tomb“, „Memoirs of Arsène Lupin: The Countess of Cagliostro“ и „Arsène Lupin: The Mélamare mystery“.
Арсен Лупен е еден од најпознатите книжевни ликови, тој е џентлмен, но и елегантен крадец, криминалец – пандан на генијалниот британски детектив Шерлок Холмс. Врз основа на романите, стриминг-сервисот „Нетфликс“ на почетокот на оваа година ја реализираше француската ТВ-серија „Лупен“ со харизматичниот Омар Сај во главната улога.
Писателот Морис Леблан (11 ноември 1864 – 6 ноември 1941) е роден во Руан, Нормандија, каде што го завршил своето основно образование. По студирањето во неколку земји и напуштање на Правниот факултет, се преселил во Париз, каде што почнал да пишува проза, криминални романи и раскази, кои во голема мера биле под влијание на писатели како Густав Флобер и Ги де Мопасан. Во својата кариера има објавено повеќе од 25 публикации, од кои најпознати се крими-романите со Арсен Лупен. Автор е на кратки раскази што ги објавувал во разни француски списанија, а исто така напишал два значајни научно-фантастични романи: „Les Trois Yeux“ (1919) и „Le Formidable Evènement“ (1920). Првата приказна за Лупен ја објавил во списанието „Же се ту“ во јули 1905 година. Поради големиот интерес, Леблан продолжил со објавување на серијата од приказни.
Во продолжение ви ги претставуваме содржините на првите четири книги од серијалот, во издание на „Арс Ламина“, кои се достапни во сите книжарници на „Литература.мк“ и онлајн, преку www.literatura.mk.
The extraordinary adventures of Arsène Lupin, gentleman-burglar
„Неверојатните авантури на Арсен Лупен, џентлмен крадец“ е прва збирка раскази на Леблан што раскажува за авантурите на Арсен Лупен и е објавена во 1907 година. Toj е духовит човек полн со доверба – Шерлок Холмс за криминал. Сиромашните и невините немаат од што да се плашат; често тие профитираат од неговата спонтана великодушност. Богатите и моќни како и детективот кој се обидува да му ја расипе забавата, сепак мораат да внимаваат. Тие се мета на пакоста и одмаздата на Арсен.
Arsène Lupin versus Herlok Sholmes
Креацијата на Леблан, крадецот и џентлмен Арсен Лупен, е сè што би очекувале од француски аристократ – духовит, шармантен, брилијантен, итар… а можеби и најголемиот крадец на светот. Во „Арсен Лупен против Шерлок Холмс“ Лупен се соочува со единствениот човек кој може да го спречи… не помалку од големиот британски џентлмен-детектив Херлок Шолмс! Кој ќе излезе како победник?
Further adventures of Arsène Lupin
Во „Понатамошните авантури на Арсен Лупен“ крадецот и џентлмен се враќа во оваа сложена приказна за измама, плен и љубов. Уште еднаш Лупен е на слобода, им го одзема богатството на богатите од под носот. Но, овој пат тој можеби го сретнува својот противник… и не станува збор за неговите вообичаени непријатели, туку паметната студентка која успева да навлезе во неговите тајни. Но, најголема опасност може да биде жената во која се вљубува Лупен, бидејќи го убедува дека ќе се откаже од животот во криминалот…
The confessions of Arsène Lupin
Во „Исповедите на Арсен Лупен“ минати се веќе две недели откако баронесата Репстајн е исчезната од Париз, земајќи со себе цело богатство во накит украдени од нејзиниот сопруг. Француските детективи ја бркаа низ цела Европа, следејќи ја трагата на скапоцени камења, но таа ги избегнува сите нивни напори. Кога Арсен Лупен ќе ја најде, нема да избега толку лесно.
Препорачува: Игор Ландсберг
Фотографии: „Арс Ламина“
ПОВЕЌЕ ОД ИГОР ЛАНДСБЕРГ: ЛОНДОНСКА ЧАЈАНКА СО ШАМПАЊ ВО ПОПЛАДНЕВНИТЕ ЧАСОВИ НА РАЗОНОДА (I дел)
ЛОНДОНСКА ЧАЈАНКА СО ШАМПАЊ ВО ПОПЛАДНЕВНИТЕ ЧАСОВИ НА РАЗОНОДА (II дел)
